SINEGER TENGAH

Sineger tengah dina basa sunda minangka arti kiasan (harti injeuman) hartina wajar, teu kaleuleuwihi, atawa merenahkeun diri dina posisi patengahan. Dina basa Arab disebut wasath, nyaeta patengahan antara ghuluw jeung taqshir/jufa  atawa patengahan antara ifrath jeung tafrith. Cindekna wasath atau sineger tengah teh teu ngaliwatan jeung teu ngurangan tina wates-wangen.

Mun dina urusan harta disebut qawwam atawa qashdan/iqtishad, sabalik tina israf jeung qatr (awuntah jeung koret)

Kecap wasath dina basa Arab mibanda rupa-rupa harti:

1. ألوسط = ألعدل, al-wasath hartina adil. Dina hadis riwayat at-Tirmidzi diterangkeun yen Nabi saw. macakeun ayat (alBaqarah:143):

وَكَذَلِكَ جَعَلْنَاكُمْ أُمَّةً وَسَطًا

Mantena ngadawuh: “Maksudna nu adil”

2. ألوسط = ألخيار, al-wasath hartina khiyar (panghadena). Dawuhan Allah (Ali Imran:110):

كُنْتُمْ خَيْرَ أُمَّةٍ أُخْرِجَتْ لِلنَّاسِ

“Maraneh teh panghade-hadena umat anu dilahirkeun pikeun (maslahat) manusa”

3. ألوسط = ألتوسط, al-wasath hartina tawasuth (moderat, boga sikep dina patengahan), nyaeta antara ghuluw (ngaleuleuwihi, ngaliwatan tina wates-wangen) jeung taqshir (ngurangan wates-wangen).

Dua ayat nu tadi (alBaqarah:143 jeung (Ali Imran:110) netelakeun yen Allah geus ngayugakeun kaum muslim sabage umat pinilih sarta sineger tengah dina sagala urusan, boh agama atawa dunya, teu  ngaliwatan atawa ngurangan tina wates-wangen. Cindekna sineger tengah dina urusan akidah, ibadah, jeung muamalah.

Patali sareng urusan akidah, Allah ngadawuh (an-Nisa:171):

يَا أَهْلَ الْكِتَابِ لَا تَغْلُوا فِي دِينِكُمْ وَلَا تَقُولُوا عَلَى اللَّهِ إِلَّا الْحَقَّ

Yeuh ahli kitab! Maraneh ulah ngaliwatan tina wates wangen dina agama maraneh, jeung ulah nyarita kalawan asma-Na Allah kajaba anu hak.

Oge dina surat Al-Mâ`idah : 77

قُلْ يَا أَهْلَ الْكِتَابِ لَا تَغْلُوا فِي دِينِكُمْ غَيْرَ الْحَقِّ

Pok caritakeun: Yeuh ahli kitab! Arandika ulah ngaleuleuwihi dina agama arandika kalawan cara anu henteu hak.

Rasulullah saw. kantos maparin pepeling

وَإِيَّاكُمْ وَالْغُلُوَّ فِي الدِّيْنِ فَإِنَّمَا أَهْلَكَ مَنْ قَبْلَكُمْ الْغُلُوُّ فِي الدِّيْنِ

“Ati-ati tina sikep ghuluw dina agama lantaran saestuna nu ngabinasakeun jalma-jalma memeh arandika teh ghuluw dina agama.” H.r. Ahmad

Binasana kaom nashoro lantaran merenahkeun Nabi Isa sabage putra Allah jeung pangeran. Sedengkeun kaom yahudi lantaran maranehna mateni para nabi jeung ngarobah kitab tauret.

Kumargi kitu Nabi saw. kantos maparin papagon

لاَ تُطْرُوْنِي كَمَا أَطْرَتِ النَصَارَى عِيْسَى بْنَ مَرْيَمَ فَإِنَّمَا أَنَا عَبْدُهُ فَقُوْلُوْا عَبْدُ الله وَرَسُوْلُهُ

“Poma arandika tong kaleuleuwihi dina muji kaula saperti jalma-jalma Nashoro geus ngaliwatan wates dina muji ‘Isa bin Maryam, saestuna kaula mah ngan saukur hamba Allah. Prak ucapkeun hamba Allah jeung Rasul-Na.” H.r. Al-Bukhari

Patali sareng urusan ibadah, Rasul kantos bendu ka tilu jalmi nu sumping ka mantena, nalika eta jalmi-jalmi teh boga sikep rek kaleuleuwihi dina ibadah. Nu hiji rek solat peuting tuluy-tuluyan moal sare. Nu hiji deui rek saum tuluy-tumuluy moal buka. Nu hiji deui rek tuluy-tumuluy ngabujang moal nikah. Saur Rasul

وَاللهِ إِنِّيْ لَأَخْشَاكُمْ لِلَّهِ وَأَتْقَاكُمْ لَهُ لَكَنِّيْ أَصُوْمُ وُأُفْطِرُ وَأُصَلِّيْ وَأَرْقُدُ وَأَتَزَوَّجُ النِّسَاءَ فَمَنْ رَغِبَ عَنْ سُنَّتِيْ فَلَيْسَ مِنِّيْ.

"Demi Allah! Saestuna kaula nu paling sieun ka Allah sarta paling takwa. Tapi kaula shaum jeung buka, solat peuting jeung sare, sarta nikah. Sing saha nu ngewa kana sunah kaula, teu kaasup umat kaula H.r. al-Bukhari

atawa dina urusan ngado’a,

ادْعُوا رَبَّكُمْ تَضَرُّعًا وَخُفْيَةً إِنَّهُ لَا يُحِبُّ الْمُعْتَدِينَ

Pek geura ngdaro’a ka pangeran maraneh kalawan handap asor jeung lalaunan. Saestuna Allah henteu micinta jalma-jalma anu ngaliwatan wates wangen. (QS. Al-A’râf : 55)

Dina urusan muamalah, diantarana dina urusan ngabalanjakeun harta, Islam oge parantos ngatur dumasar kana sifat sineger tengah. Dawuhan Allah:

وَالَّذِينَ إِذَا أَنْفَقُوا لَمْ يُسْرِفُوا وَلَمْ يَقْتُرُوا وَكَانَ بَيْنَ ذَلِكَ قَوَامًا

“Jeung jalma-jalma anu upama ngabalanjakeun hartana, henteu awuntah jeung henteu koret, sarta salawasna maranehna sineger tengah” (QS. Al-Furqôn : 67)

Nyakitu oge dina caritaan jeung talajak. Rasul ngadawuh dugika diulang tilu kali :

هَلَكَ الْمُتَنَطِّعُوْنَ

“Cilaka al-Mutanaththi’ûn (jalma-jalma nu kaleuleuwihi dina omongan jeung talajak)” H.r. Muslim

Kumargi kitu Rasul parantos maparin papagon:

خَيْرُ الأَعْمَالِ أَوْسَطُهَا

“Panghade-hadena amal teh anu patengahan” H.r. ad-Dailami

Saur Wahab bin Munabih, “Saestuna tiap perkara ngabogaan dua tungtung jeung patengahan. Lamun jalma nyekel kana salah sahiji tungtung, tinangtu bakal doyong/condong tungtung nu sejen. Tapi lamun nyekel nu patengahan, eta dua tungtung bakal tawazun (saimbang). Ku sabab kitu, prak anjeung kudu sineger tengah dina sagala perkara” H.r. Abu Ya’la